政情：李鋈麟兄弟秋祭祈福減爭拗
近年香港政治爭拗不斷，單係處理議員宣誓「播獨」兼辱華都已經嘈到拆天。有見及此，東華三院副主席李鋈麟，尋日就聯同二弟李鋈興、三弟博愛醫院副主席李鋈發，以李氏宗親會名義進行秋祭，希望為香港市民及政局祈福。
李鋈麟着上一身花紋極為豐富嘅裝束，帶領十多位李氏宗親，前往上環文武廟進行秋祭。佢認為持續嘅政治爭拗，除咗令立法會無法正常運作，亦會阻礙政府施政，所以希望為港人祈福消災，祝願香港能夠達到政通人和。而李鋈發都有相似嘅願望，希望立法會運作順暢，抵制「拉布」行為。
兩人嘅願望都不約而同提及立法會，但新一屆立法會開始不足一個月，建制派已經發動流會攻勢，以阻撓宣獨辱華嘅青年新政梁頌恆及游蕙禎不能再宣誓，唔知李氏宗親呢個願望幾時先能夠實現到喇！