港大醫學院尋日舉辦一百三十周年活動，現場有導賞團及多個食品攤位，仲有小朋友遊樂設施，畀一眾校友及師生參與。食物及衞生局局長高永文同副局長陳肇始都有出席，期間醫學院院長梁卓偉想拉高永文入波波池玩，起初高永文都唔係好情願，但最終敵不過梁卓偉嘅熱情，除鞋跳咗入池。陳肇始見到兩人玩得咁開心，都忍唔住跳埋入去，三個大細路童心未泯，玩到樂極忘形。不過，三個大人逼喺一個細小嘅波波池，即刻逼到一眾小朋友要「彈開」讓位先得！
