政情：貪靚劉國勳 箍一隻門牙
一般人認為只有女人先會貪靚，但其實男人都好姿整，好似立法會議員劉國勳（阿勳）就因為貪靚而去箍牙。其實佢正在接受箍牙療程，因為用咗隱形牙套，所以大家先唔發覺佢箍緊牙啫。而阿勳亦非常聽話，跟足指示晚晚用橡筋，務求整靚棚牙。
兩年療程就快完成
阿勳直言，接受療程全因為貪靚，目前已經箍咗兩年，進度唔錯，過程亦唔覺得辛苦，相信就快可以完成整個療程。佢估計，因為只得一隻門牙唔齊，所以療程時間可以縮短。照咁講，阿勳咪只為一隻門牙去箍牙？其實都唔奇吖，事關過去好多時見佢影相都合埋個口，就算笑都只係微笑，唔通真係驚人見到佢棚牙唔整齊？