政情：何秀蘭抽游BB水酸味濃
本土派青年新政立法會議員游蕙禎（游BB）關注港人搵唔到房「扑嘢」，引來各界熱議，而立法會前議員何秀蘭亦連忙喺社交網站抽水，指游BB言論令公眾側目，形容俗語、粗鄙語成為新進議員隨口而出嘅用語，係集體選擇嘅結果，佢突然話鋒一轉，指摘游BB更大嘅問題，係佢嘅長髮唔環保。理論膠味甚濃，更加激發網民爭相揶揄！
指游長髮唔環保
何秀蘭指游BB嘅長髮需用大量食水保持整潔，如果冇用天然物品造嘅洗髮護髮素，呢啲化學物品會增加淨化污水所需嘅電力，傷害環境，加速極端氣候變化，更值得公眾監察。
連任失敗嘅何秀蘭突然指摘成功當選嘅游BB，引來網民直言「好酸啊何前議員」，又有人叫佢先行削髮才講，有人更指佢同「長毛」立法會議員梁國雄係好朋友，點解唔見佢幫長毛剃髮？何秀蘭其後喺社交網站回應話，每個世代用詞不同，一直唔認為「扑嘢」論有問題，又重申頭髮真係唔使咁長，用好多水電，自己見親長毛講環保，都叫對方剪頭髮先。