政情：領導層去田少化自由黨回歸建制
自由黨尋日選出新一屆領導層，一如外界所料，原任黨主席嘅立法會議員鍾國斌（Felix）出任黨魁，張宇人（Tommy）就接任黨主席。兩人甫坐正即指願意與特首梁振英（CY）保持良好關係，與打着「ABC」（Anyone but CY）反梁旗幟嘅該黨榮譽主席田北俊（田少）劃清界線，反映田少主事時代正式告終，該黨今後或重回建制陣營。
張宇人稱「ABC」非該黨立場
田少因多番發表反梁言論，早前失去全國政協一職後即辭任該黨黨魁，今屆更退出立法會舞台。田少一向同CY唱反調，過往多次喺關鍵時刻「唔聽話」，被建制陣營視為「反叛派」，同中央關係亦愈見微妙。
但新主席Tommy就話，「ABC」唔係黨嘅立場，佢本人就唔支持，擺明與田少劃清界線。Felix更指，假若CY接受該黨有關政策嘅建議，並將建議落實，或者會重新考慮支持佢喎！