政情：公民講場：高永文重推醫改先要過兩關

受拉布所累，上一屆立法會未能如期通過醫委會改革嘅《二○一六年醫生註冊（修訂）條例草案》。政府成立由立法會議員、病人組織同醫學界人士合組嘅三方監察平台，並由食物及衞生局常任秘書長聶德權做召集人，希望有共識之後可以將條例再次闖關。食衞局局長高永文尋日話會努力同各持份者溝通，希望持份者可以放下歧見，凝聚共識，草案可以喺明年上半年重新交上立法會。不過，醫學會日前就委任主力拖死草案嘅醫學界前議員梁家騮（怪醫）參與平台，而現任醫學界議員陳沛然又話唔排除拉布，所以要尋求共識都唔係高永文講得咁容易，首先要過咗怪醫同陳沛然呢兩關先。