政情：民記兩老垂簾聽政?

建制派嘅群組已經全面更新，例如退休同競逐連任失敗嘅前議員已被踢出群組，但明明今屆建制派取得議席由上屆四十三個減至四十個，但群組成員數目竟然維持不變。據了解，其中「新增」兩人係已卸任嘅資深議員，即民記「兩老」葉國謙同譚耀宗仍然喺群組內仲無離開到，其中葉國謙依家仲係群組管理員，負責管理群組成員，有增減成員嘅權限。

往績不佳仲插手

其實建制派已協調由商界廖長江做建制派班長，而民記陳克勤做副手，點解「兩老」仍然陰魂不散咁，硬要留喺建制派群組呢？唔通因為今屆建制派新丁多，再加上廖長江同陳克勤都係新手，所以要留喺群組繼續指點指點？抑或係建制派最終決策者仍然係一班舊人？

仲記得喺舊年六月表決政改方案一役中，葉國謙帶領建制派拉隊離場而造成世紀大甩轆，令政改方案遭大比數反對下否決，「兩老」於此役嘅表現如何，大家都心中有數，係咪真係咁靠得住？聽聞新班長廖長江喺群組內都有積極發言，而且表現出班長應有嘅角色，好心「兩老」就咪再插手喇！

周浩鼎密密發問

好嘞！四十個加「兩老」等於四十二個，咁仲有一個係邊位？咪就係自稱「中間偏黃」嘅醫學界陳沛然囉，佢早前已透露獲邀請加入建制群組，仲話多數會已讀不回添！但據聞實情就唔係啦，佢喺群組內發言都唔少o架！建制派邊緣人、獨立謝偉俊都好積極發言，而議會新丁周浩鼎就非常好學，經常喺群組內發問，而且問題亦都同議會息息相關，睇嚟佢正為出任建制派重炮手做定功課喎。