中環出更：問及扑嘢論鄭國漢「博雅」擋箭
身為「嶺南人」嘅青年新政立法會議員游蕙禎（游BB）早前出席論壇時爆seed，忽然爆出「扑嘢（做愛）都搵唔到地方」嘅言論，以此表達對香港資源分配、土地房屋等問題關注，嶺大校長鄭國漢尋日出席榮譽院士頒授典禮時冇正面回應「扑嘢論」，佢選擇借該校提倡嘅「博雅教育」理念作擋箭牌，不點名希望游BB可以做到「既博且雅」。佢其後又話今時今日作為政治人物，應選擇最恰當、有效嘅表達形式，又認為依家大家可以認識到游BB嘅表達方法。
李秀恒指字眼粗俗
相比之下，尋日獲嶺大頒授榮譽院士銜嘅廠商會會長李秀恒就敢言得多。對於游BB嘅「扑嘢論」，李秀恒表示感到詫異和震驚，直指中國人有傳統文化同修養，於表達時應文雅啲，唔應該用粗俗字眼。佢又意有所指，立法會議員嘅表現具有示範作用，而且受人尊敬，表明議員如用粗俗字眼會冇人欣賞。
李秀恒其後又自爆自小已接觸粗口，事關細個時曾居住於板間房，頭房同尾房住客經常以粗口對罵，因此自己對粗口並唔陌生，甚至「學得好叻」，但佢強調，識得判斷咩時候先講粗口，認為「講同聽係兩回事」，唔會因為經常聽而耳濡目染喎。
卓妮