中環出更：「泰」多化妝品未成港主流
香港化粧品同業協會（協會）日前舉辦了「資歷架構友善僱主表彰計劃」嘉許典禮，唔少業界精英都有出席，卓妮見到現代美容首席執行官李守義（Francis），講起近年除咗歐美日韓品牌外，仲多咗好多港人用泰國化妝品，不過對此佢就認為暫時仲係難成氣候。
Francis話，大部分港人都依然鍾情日韓及歐美產品，雖然每年展覽都會見到泰國產品，但咁多年嚟始終都唔係主流，或者因為泰國產品好多原料都係來自內地，用家信心相對冇咁大。當日現代美容係獲頒獎項嘅公司之一，Francis就話，美容業嘅員工培訓好重要，皆因呢行日新月異，每年都有新技術推出，為咗確保員工掌握最新資訊同保持競爭力，早前佢哋就派咗一班員工去韓國上堂喇！
業界落力提升質素
同場仲有協會會長何紹忠（Joseph）、副會長陳礎基、莎莎主席郭少明女兒兼協會理事長郭詩慧同理事洪玉芝等。提到美容行業嘅整體情況，Joseph就話，業界除咗面對一般零售市道慘淡問題外，亦憂慮早前消委會提議政府成立為爭拗雙方提供免費調解及仲裁服務嘅消費爭議解決中心會被濫用，協會現時工作重點就係鼓勵同業提升服務質素，以建立專業地位。
卓妮見郭詩慧及洪玉芝好啱傾，原來兩人係妯娌關係，洪玉芝嘅老公即係威威洗衣粉億豐行總經理陳泳聰，係郭詩慧老公陳振邦嘅阿哥，佢哋四人更加係同一間大學畢業添！
卓妮