政情：游蕙禎關注港人冇地「扑嘢」
香港土地問題真係好嚴重，唔單止特首梁振英關注，搞到連沙田石門傑志中心塊地都想搶嚟起樓，連本土派嘅青年新政立法會議員游蕙禎（游BB）都好關注，仲話土地問題搞到香港人連「扑嘢」都搵唔到房！佢真係用「扑嘢」呢兩個字，唔係講「做愛」。
理大學生會尋晚喺校園搞咗個論壇，討論收回單程證審批權問題，獲邀講者全部係泛民及本土派議員，結論當然係一致支持收回審批權，冇乜火花可言。
不過，到咗論壇尾聲，游BB忽然「爆seed」，話香港人一畢業就要向政府還錢，又供唔起樓，最慘係「就算我哋要扑嘢，我哋都搵唔到房去扑，呢個係一個好現實嘅問題！」所以一定要限制新移民湧港囉。好期待佢喺立法會會議上發表有關言論，睇吓立法會主席會有咩反應。