政情：今日你上鏡：史立德父子撐環保少食翅

香港人愈嚟愈追求環保生活，唔少人都支持無翅飲宴。中華廠商聯合會副會長史立德都發現，近年香港嘅餐廳已較少供應魚翅，而自己舉行活動時，亦多數用羹代替魚翅以示支持環保，而佢個仔Kenneth都話一向甚少食魚翅，果然兩父子都為生態平衡出一分力喎！史立德仲話有朋友最近去咗非洲旅行，傳咗大量風景同野生動物相片同佢分享，搞到佢心癢癢都想去。不過，佢就大嘆去一趟非洲要離港逾二十日，坦言現時工作太忙無法抽空，唔怪得佢只好睇相止渴喇！