政情：「鄭」「容」博士履歷秘書處連環錯
新一屆立法會議員嘅履歷資料已上載至立法會網站，但發現班議員新丁喺申報學歷資料錯漏百出。好似新民黨嘅容海恩，佢本應係法律博士（簡稱JD），但網頁中卻寫成較高級嘅法學博士（簡稱JSD），簡寫多咗個S字o架，學歷忽然「升呢」，而熱血公民鄭松泰嘅英文履歷內容亦被發現串錯字，竟然將Tuen Mun寫為Tuen Mum，屯門變咗「屯媽」。但係，直至尋晚十點幾，立法會秘書處認衰，指容同鄭嘅錯字已修改，並因輸入錯誤資料而引起誤會致歉。
容海恩多個「S」升呢
容海恩喺立法會網頁上報稱嘅履歷資料連番出錯，喺學歷及專業資格一欄中，先係佢嘅履歷由JD突然升呢做JSD，被指兩個學位存在好大差別，質疑有誤導市民之嫌外，佢喺該欄中寫上「香港城市大學法學博士」，同佢一直所稱嘅城大法律博士唔同，而網頁嘅英文版本中，更寫上「FD, City University of Hong Kong」，同法律博士嘅簡稱JD亦有出入，引起唔少網民質疑。
有大律師指出，法律博士（Juris Doctor）同法學博士（Doctor of Juridical Science）係完全唔同嘅課程，最大分別係只有法學博士畢業生能以「博士」自稱，所以容海恩喺立法會網頁上以法學博士表達或有誤導之嫌，而英文頁面上嘅「FD」應該係打錯。
容海恩回覆查詢時指自己唔知情，相信涉及人為打錯字，今日會即刻檢視情況，再向立法會秘書處了解。
有網民亦發現鄭松泰嘅英文履歷內容，最少有兩處出錯懷疑串錯字，首先係學歷及專業資格一欄，中文版申報為社會學博士，英文版理應為「PhD in Sociology」，但立法會網頁顯示，Sociology錯誤寫為「Sociolosy」；其次喺辦事處地址一欄，鄭松泰申報其地址位於屯門，但疑手民之誤，喺英文版將Tuen Mun誤寫為Tuen Mum，屯門變咗「屯媽」。
民主黨暗寸「泰核突」
民主黨副主席羅健熙喺facebook附上鄭松泰英文履歷嘅連結，並列舉「Tuen Mum」同「Sociolosy」兩個錯處，直指唔知係寫得「核突」令人睇錯，抑或係串錯字。
正當以為班新丁出錯，點知立法會秘書處喺晚上十點幾認衰，並對因錯誤輸入資料及而引起誤會致歉，秘書處會重新檢討收集及發放議員個人資料嘅程序，以確保上載到立法會網頁嘅議員個人資料準確無誤。