中環出更：黃之鋒又去台灣密謀攪局
喺台灣發起太陽花學運嘅核心成員，過去曾被港府拒絕入境，而一直倡議本土自決嘅香港眾志，其秘書長黃之鋒尋日喺facebook貼文同上傳照片，指昨晨抵達台北後，隨即與太陽花學運催生嘅新政黨時代力量主席兼立法委員黃國昌、學運發起人陳為廷同施懿倫交流見面，仲一齊展示寫有Determine Future字樣嘅布袋，好明顯係討論前途自決嘅議題。
見太陽花學運成員
黃之鋒仲提及，喺香港眾志創黨之前亦曾到台灣，聽佢哋分享公民社會同投入競選嘅經驗，盼望兩地能互相借鑑。時代力量喺今年年初台灣立委選舉中共得五個議席，成為第三大政黨。黃之鋒當時亦有去台灣觀戰，認為時代力量同香港傘兵有相似嘅地方，雖然台灣同香港情況唔同，但時代力量喺立委選戰報捷，對香港亦有啟示。
實際上，被稱「學運三子」嘅黃國昌、陳為廷同林飛帆，早喺一四年六月曾申請來港被拒，而今年一月初當時身兼立委候選人嘅黃國昌，收到外國傳媒邀請到香港出席政論節目，卻被港府拒發入境簽證，佢猜測拒發原因係港府受北京政府控制，又直言香港「根本喪失了自治」。
卓妮