中環出更：臨盆張雅麗肉緊無蟹食
生仔生女真係上天注定，唔到自己揀o架！香港島婦女聯會主席張雅麗尋日出席一個活動時，講起十一月即將出世嘅第三胎又係生仔，連續生三個囝囝，相信唔少傳統家庭都會相當羨慕，但張雅麗其實恨生女恨到發燒，但係問佢會唔會再試下追個女，佢就話唔會啦！
張雅麗話佗呢胎特別辛苦，要臥床休息，食嘢亦特別小心，食啲少甜嘅健康嘢多，依家已經八個月，只係重咗二十磅啫，之前有嗰兩胎重成三、四十磅o架！不過最難忍就係唔食得蟹，仲要撞啱秋天係食蟹季節添，佢講起都相當肉緊。
講起生小朋友，新民黨主席葉劉淑儀亦諗起自己當年亦做過高齡孕婦，要相當小心，一知道自己有咗，醫生就要佢瞓床三個月，最緊要係體重唔好增加得咁快，因為年紀大容易血壓高及糖尿。聽完兩位咁講，真係覺得生小朋友一啲都唔易。
張國鈞投訴媽媽廚藝差
不過，轉個頭就聽到民建聯立法會議員張國鈞，竟然講起自己媽媽煮飯唔好食，認真大膽！佢話自己同爸爸、妹妹都投訴咗好多年，張媽媽係職業女性，自己都承認冇時間、冇心機煮嘢食，永遠只會菜心炒牛肉、蒸大魚、蒸水蛋、番茄煮蛋。張國鈞自從小五、小六就會買餸煮飯，一直煮到中二、中三，但自己都只識煮番媽媽煮嗰幾味，最叻係三色蛋，但依家入廚房，太太就會叫佢出返去，怕佢搞亂檔喎。
至於工聯會立法會議員郭偉強就話，自己一年食唔到十餐住家飯，佢同太太兩個都要工作，係「無飯夫婦」，而自己煮嘢食認真麻麻，最經典嗰次，就係突然發現廚房有陣味傳出，原來自己煲湯煲乾水，連個煲底都燶咗少少，不過冇人鬧佢，因為當時得佢自己一個喺屋企喎。
卓妮