政情：大輝靚抽 讚深明吳得掂思維 Ann擬接掌教委會
新一屆立法會即將「開波」，十八個事務委員會主席爭奪戰已經展開。原本由前立法會議員林大輝（大輝）擔任主席嘅教育事務委員會，亦隨住大輝卸任要物色新主席人選。民建聯議員蔣麗芸（Ann）尋日話，建制派已商量過，認為佢係合適人選，而佢都樂意接棒。大輝知悉後就話，深信新主席會更明白教育局局長吳克儉（吳得掂）嘅思維，似乎暗踩緊Ann同吳得掂係同一層次。
葉建源加入戰團
建制派推舉Ann做教育事務委員會主席，但泛民方面，教育界議員葉建源都打算加入戰團。咁啱尋日政府委任大輝下年四月起擔任香港體育學院董事局主席，對於Ann話樂意擔任教育事務委員會主席，大輝就話深信新主席比佢本人同葉建源更加識同吳得掂溝通，會明白吳得掂思維，喺配合吳得掂推動教育政策上有莫大幫助，似乎係暗踩多過讚囉。
Ann就話，自己喺港大、城大、嶺大、中大及理大都幫過手，都叫對教育有認識，建制派商量後亦認為佢係合適人選。對於大輝言論，佢就話相信大輝深明人和事和之道，仲話大輝會收到喎。