中環出更：滋味食材製佳餚 秋祭瀛合港人
香港人一向鍾意日本菜，熱愛程度可以話係有增無減。早前「窮富翁」叙福樓集團執董黃傑龍（Simon）就同一班飲食界人士成立香港日本食品及料理業協會，仲請埋日本駐港總領事松田邦紀參加成立典禮。講起香港連續十一年成為日本農產品最大出口市場，佔近四分一咁多，呢兩個月日本駐港總領事館仲會喺香港舉辦日本秋祭活動，希望以後每個秋天都好似日本嚟咗香港咁！
擔任協會主席嘅Simon話，港人對日本菜認識不下於中菜，除咗識分辨食品來自日本邊啲地區，仲食得好「專」，拉麵就拉麵，燒肉就燒肉，唔似以前咁一間舖頭食晒壽司、拉麵等所有嘢，係好專業嘅食客，相對其他地方菜式如意大利菜，就較少分得咁仔細。而秋天係農作物收成期，係唔少食材最靚嘅季節，呢個時候成立協會就啱晒喇。
吳德曉欣賞日本人種植有心
同場仲有協會副會長吳德曉、財務長兼蛋撻王董事總經理莊裕坤、香港餐務管理協會會長楊位醒及主席梁振華、現代管理（飲食）專業協會主席黃永幟及稻苗學會主席邱金榮等。莊裕坤話，旗下產品好多食材都係來自日本，食客一食就知分別。黃永幟就話中餐都會用到日本食材，例如炒牛柳粒換成和牛或使用日本醬汁烹調中菜等，都令菜式煥然一新。
吳德曉就話除咗日本料理外，水蜜桃及提子等水果亦極受歡迎，曾經去過日本農場，見到日本人種植時真係逐粒提子逐個水果咁照顧，印象深刻，同其他地方大量生產模式分別好大，所以好食有原因。