政情:公民講場:波叔搶地起樓 姚松炎又開火

候任立法會建築界議員姚松炎喺橫洲發展爭議,對發展局局長陳茂波(波叔)等主責高官窮追不捨,而一波未平一波又起,姚松炎擬再下一城,聯同即將卸任議員嘅陳家洛疑再向波叔「開火」,批評政府打算將鴨脷洲利南道香港駕駛學院改劃成私樓,認為此舉不但再次剝奪居民休憩用地,更破壞多年地區規劃,促請政府聆聽民意,還海濱於民。仲記得政府喺橫洲爭議擾攘十六日先舉行記者會撲火,但規劃署尋日就即刻回應姚松炎,話唔反對改劃,亦認為政府嘅方案毋須更改,睇嚟雙方會繼續駁火,唔知點收科呢?

第一手消息請下載on.cc東網iPhone/iPad/Android/Windows Phone Apps