政情：中大醫學院35歲慶生陳家亮 梁卓偉「合卺交杯」
中文大學醫學院尋晚喺灣仔會展舉行三十五周年院慶晚宴，筵開百席，逾千人出席，最有趣嘅莫過於中大醫學院院長陳家亮（Francis）同香港大學醫學院院長梁卓偉（Gabriel）嚟張「合卺交杯」嘅世紀合照。
歷屆院長多現身添歡樂
中大醫學院舉行「生日派對」，Francis緊張之餘，又非常開心，四圍同嘉賓祝酒，講吓昔日趣事。Gabriel喺呢個咁開心嘅日子，仲主動走埋去Francis度同佢祝酒，仲話要「合卺交杯」。Gabriel講笑咁話呢張係「世紀合照」，睇嚟佢哋唔單止係友情，仲係兄弟情！
尋晚中大醫學院歷屆院長大多數都有現身，其中鍾尚志教授仲要戴佢至愛嘅Snoopy呔出席，仲襯埋紅色，配合番喜慶氣氛。中大醫學院為各位嘉賓送咗一份特別禮物，就係一隻着咗手術袍嘅熊公仔，可愛得嚟，又能代表醫學院喎。