政情：民協老「馮」留低哀「莫」退位
由上年嘅區議會選舉至剛過去嘅立法會選舉，多名老將意外落選，都顯示選民渴求政壇加速年輕化舊人退下火線，新人上場似乎係大勢所趨。可惜，以筍做黨徽嘅老牌政黨民協仍喺立法會地區直選派出多名老將上陣，包括由馮檢基（阿基）空降新界西出選，最後被「拔筍」、全軍盡墨收場。該黨主席、現年四十四歲嘅莫嘉嫻前日喺facebook宣布因選舉失利而辭任主席一職，期望新一屆嘅領導層可回應社會上新舊交替嘅呼聲，仲話會考慮自己係咪適合喺政圈繼續發展，唔通佢想退出政壇？
上任僅九個月
莫嘉嫻喺今年初先當選主席，任期僅僅九個月就請辭。佢話辭任主席係承擔選舉失利嘅政治責任，有關申請前晚正式獲中委會接納，職務將由現任副主席施德來署任，直至另選主席為止，民協最快會喺年底開會討論新任領導層安排，期望新一屆嘅領導層可以回應社會上新舊交替嘅呼聲。莫嘉嫻又話民協多位年輕新一代都已經獨當一面，而自己亦唔算年輕，辭任主席之後需要時間沉澱同思考方向，仲會考慮自己未來適唔適合繼續喺政圈發展。
盼藉機改流弊
其實莫嘉嫻當選主席之前，民協都係換湯不換藥，正副主席由阿基、譚國僑同廖成利三位元老輪流擔任，直至莫嘉嫻做主席，民協先至被外界認為有步向年輕化嘅可能。可惜，一人之力都難以改變多年流弊，莫嘉嫻初選失利唔能夠出選立法會，都標誌住民協難以作出重大革新。
有人就認為作為中生代嘅莫嘉嫻辭任主席，考慮退出政壇係斧底抽薪，目的係告誡一班民協元老無謂再作糾纏，等民協有新發展。究竟莫嘉嫻嘅「苦肉計」係唔係可以成功呢，就睇年底新任領導層嘅選舉結果喇！