電視廣告都有賣，店舖將貨物擺到通街都係，市民「走投無路」，紛紛要求商戶高抬貴手，「畀條路行吓」。當局聲稱由今日起嚴厲執法，究竟係嚟真定係得個噏字，大家不妨拭目以待。
店舖阻街問題有幾嚴重，齋睇數字就知，過去三年食環署共檢控近六萬宗違例個案，記者去旺角、深水埗等阻街黑點巡視後亦發現，店舖「佔領街道」各出奇謀，有人將貨品放到旁邊未開門嘅店舖，有人甚至索性將街道名牌當「陳列架」，部分道路撞正維修工程，搞到人車爭路，真係睇見都牙煙。
話時話，店舖阻街已經唔係今時今日嘅事，情況之所以多年冇改善，皆因負責部門互相推莊，多人管等於冇人管。之前申訴專員公署對此有非常生動嘅描繪，食環署、地政總署及屋宇署等執法部門各自為政，各部門傾向矮化自己角色，減少執法行動嘅積極性。亦即係話，官老爺一個二個好似佢哋老頂咁「推比人」上身，唔七國咁亂至奇喇。
咁就難怪當局宣布取締店舖阻街，即時定額罰款千五蚊，大部分市民都舉腳贊成。不過問題嚟嘞，區區千五蚊究竟有幾大阻嚇作用呢？當局之前同樣將垃圾蟲定額罰款提升至一千五百元，結果情況冇改善不特止，檢控數字反而多咗，更何況店舖打開門做生意？有辦你睇，好多食肆一到夜晚就好似攞正牌咁霸晒半條街，搞到四圍烏煙瘴氣，居民怨聲載道，罰極都冇改善，講到尾咪因為罰款計埋入成本，「除笨有精」囉。
所以話，食環署取締店舖阻街唔係話唔啱，但如果只係做騷咁做，風頭過後一切打回原形，都係嘥氣嘅啫。當局運動式執法大家都見識唔少，好似全城清潔運動咁吖，隔幾年就大鑼大鼓上演一次，結果衞生黑點幾十年如一日；又好似打擊違例泊車咁，警方派完一輪牛肉乾之後就偃旗息鼓，結果馬路仲塞過舊時。
再講吖，阻街嘅絕對唔止店舖咁簡單，當局頭痛醫頭，做啲唔做啲，點都唔啱數。好似宣傳易拉架通街亂放咁，同樣係老大難問題，淨係旺角行人專用區，每逢假日易拉架就十足十八卦陣一樣，加上宣傳人員沿街拉客，亂過亂世佳人；仲有流動廣告燈箱，簡直係五步一樓，十步一閣，阻礙行人事小，電線亂咁駁出街隨時引發火警事大，對於呢啲亂象，當局居然隻眼開隻眼閉，同鋸掉箭頭嗰位蒙古大夫有咩分別吖。
始終都係古人講得啱︰一屋不掃，何以掃天下。港產官僚連店舖阻街咁簡單嘅問題都管唔掂，旨意佢哋處理國計民生嘅大事，蚊都瞓蛇都死喇！