政情:清潔龍撈過界區詠芷照畀Like

香港單車節明日舉行,單車迷熱切期待之餘,就連清潔香港大使「清潔龍阿德」都好關心。呢位早兩日先至首現真身嘅食物環境衞生署新進紅人,經常畀人將佢同環境局之星「大嘥鬼」相提並論,尋日阿德就索性挑機,喺Facebook出post呼籲參加單車節嘅朋友自備水樽,減少即棄塑膠產品,就連環境局靚女政助區詠芷都有畀Like,唔怕阿德撈過界搶客。

有追開清潔龍阿德嘅朋友應該知道,阿德好鍾意玩食字,今次就以「又要威又要帶水樽」做tag出post,指一年一度香港單車節就舉行,希望各位破風手自備埋水樽,幫手減少即棄塑膠產品,咁就真係型過當年嘅野野村輝啦!野野村輝係日本勵志漫畫《單車小霸王》、又名《鐵馬頑童》嘅主角,以高中單車隊為故事大綱嘅漫畫,早幾年曾經被改編成熱血青春校園偶像電影。

睇番阿德隨文貼上嘅自拍相,戴晒頭盔同太陽眼鏡又帶埋自備水樽,雖然冇電影中飾演野野村輝嘅男主角遠藤雄彌咁型,但勉強都算幾霸氣。

第一手消息請下載on.cc東網iPhone/iPad/Android/Windows Phone Apps