政情：本土派議員坐到成盤散沙

公文袋強調唔讓位

立法會秘書處已經順利完成辦公室房間分配，至於會議廳座位安排就會喺下周二開會討論。據了解，建制派已經一早統籌會議廳座位安排，並已將建議提交秘書處，但非建制派就未有定案。有本土派候任議員透露，公民黨（公文袋）願意讓出左邊前排六個位置予長毛梁國雄、慢必陳志全及支持本土自決嘅朱凱廸、劉小麗、香港眾志羅冠聰及建築界姚松炎六人，以便佢哋日後進行議會抗爭，但公文袋中人就否認，強調唔會讓位。

除咗公文袋同本土派各說各話，會議廳座位安排另一個爭議係連任議員不肯調位，好似公共專業聯盟梁繼昌、莫乃光就堅持死守原有座位，又要求幾個泛民功能界別議員要「排排坐」，令到秘書處安排座位更加困難。如果最後講唔掂數，本土派議員就要打散坐，除咗部分議員坐到最後排，有議員更要坐在建制派人堆之中，可說是深入敵方陣地，一舉一動將被建制派監視得一清二楚。

揀辦公室 抽生死籤

至於辦公室房間分配，都唔多順利，據了解，青年新政梁頌恆及熱血公民鄭松泰，同時要求接收原屬激進泛民黃毓民位於十樓嘅房間，要抽「生死籤」解決，結果鄭松泰爭贏，令到梁頌恆與同屬青年新政嘅游蕙禎房間未能相連，中間隔住慢必。聽聞青年新政曾經提出同慢必調房，但失敗收場。另外要求調房不果嘅仲有朱凱廸、姚松炎及羅冠聰，佢哋曾經提出同街工梁耀忠調位，等三人房間可以相連，但梁耀忠堅持不調位。

講到尾，抽房間同揀座位只係小事，但已經反映非建制陣營無統籌、新舊議員存在代溝等嚴重問題，立法會未開鑼已爭餐死，未來四年內鬥肯定永無寧日！