政情：蔡冠深搞音樂會 邀韓星一波三折
為咗迎合年輕人口味，香港中華總商會永遠名譽會長蔡冠深上年邀請韓星來港參與青年音樂會演出，結果叫好又叫座，所以今年打算再度聘請韓星來港表演，但竟然阻滯重重。好彩蔡冠深口才了得，經多番解說之下，多隊韓國人氣組合先至落實參與下月嘅音樂會演出。
蔡冠深話，由於去年青年音樂會反應熱烈，於是就決定今年再度舉辦，佢亦早於演出日期前十個月，向某幾隊韓國當紅樂隊洽談演出。由於音樂會係非牟利，酬金自然有限，但係蔡冠深仍徵得對方嘅初步合作意向。但係過咗幾個月，有韓星話無法抽出檔期，惟有馬上另覓人選，雖然後來有樂隊答允來港，但又礙於早前內地出現杯葛韓星嘅「禁韓令」，以致對方喺合約面前猶豫不決。
親赴韓駐港領事館商談
眼見演出日期逐漸逼近，蔡冠深親赴韓國駐港領事館商談，重申邀請韓星赴港演出純屬文化交流，以及願意合約條文以韓文為準，對方先至同意簽約來港演出，可謂一波三折。