政情：特區高層互廝殺 港恐車毁人亡

一萬三千個公營房屋突然人間蒸發，政府堅持係分階段進行，首階段提供四千個單位，而關注橫洲發展嘅候任立法會議員朱凱廸一直咬住政府唔放，喺上星期與發展局局長陳茂波同運輸及房屋局局長張炳良會面後，更踢爆政府多次就發展「摸底」，鬧爆咁嘅做法等同「官商鄉黑」勾結，而張炳良就反駁咁唔代表勾結，又話呢啲非正式會面，都係房屋署官員去做，佢從來都無參與，講到好似同佢無關咁，勁卸膊囉。

未幾，元朗區議會前主席梁志祥證實政府官員與地區人士曾經先後進行三次「摸底」，而最後一次把建屋數目縮至四千個，完全無交代理由，簡直係兜巴摑落張炳良到，跟住仲有傳媒報道橫洲發展項目工作小組的內部文件，揭露工作小組由梁振英掛帥，而首階段建屋四千個。

數小時內各劃清界線自保

眼見火球愈燒愈烈，梁振英前日出嚟竟然唔係撲火，而係將個波踢畀下屬。佢承認自己係主持橫洲同皇后山工作小組會議，而橫洲發展涉及兩個政策局，包括運輸及房屋局由政務司司長負責，而發展局則屬於財政司司長負責，佢又突然披露自己負責橫洲涉跨部門嘅統籌工作，但發展細節就係由曾俊華領導嘅土地供應督導委員會跟進，又反駁橫洲建屋量縮水指控，強調四千個單位係首階段，目標係一萬七千個單位。

事隔四小時，曾俊華就隔空反擊，更不惜自揭身為工作小組成員未曾出席過小組會議，並爆料指督導委員會無決定將橫洲發展計劃以分期形式進行，就連林鄭月娥隨後亦出來劃清界線，指自己並非土地供應督導委員會及有關橫洲同皇后山土地發展工作小組嘅成員。咁講法好明顯係為求自保，事不關己，劃清界線，你死你事。

史無前例 港人自求多福

呢種互相鬥卸責、互相廝殺嘅情況，喺前朝政府從來無出現過，難為現屆政府仲成日強調係一個團隊喎，實情係各高官一啲都無為政府面子着想，難怪被批評為冇靈魂、冇神經政府喇，咁嘅政府遲早搞到車毀人亡，香港人真係要自求多福！