政情：嚴志明唔做則師畫傢俬
香港工業總會副主席嚴志明（Eric）從事辦公室家具生意，但其實佢讀書時曾修讀七年建築並一度擔任過則師。Eric尋日出席「深港設計雙年展」開幕禮時話，佢嘅興趣在於文化建築，但回港後覺得發展空間細，因為只有博物館、圖書館等建築與文化有關，更要進入政府工作先能夠繼續朝呢方面發展。加上佢做則師期間都有畫吓家具設計，而且反應仲唔錯添，所以就決定轉行喇。
曾修讀七年建築
不過，要放棄七年嘅努力並唔容易，Eric都承認當時有所掙扎，但佢發現建築設計時要顧及建築物不同範疇，亦都需要同相關專業顧問溝通，所以令到佢對力學、水電等方面有一定認識，而呢啲知識對佢設計家具都有幫助，所以冇浪費七年努力咁話，難怪佢最終都能夠下定決心轉行喇！
Eric仲話，覺得則師同家具設計分別不大，唔同嘅只係分別在於成品及規模。而佢平日都一樣要尋找靈感，認為最重要係有好奇心，去理解每樣設計嘅原因；睇嚟佢都好享受現時嘅工作喎。