中環出更：搞事四人幫聚首疑密謀攪局
立法會選舉啱啱結束，但有班人似乎又搞事心起。壹傳媒黎智英（漢奸黎）選舉期間力谷被揭發多次收受其秘密捐款嘅民主黨（白鴿黨）候選人當選，但選舉後依然動作多多。漢奸黎繼日前喺寓所召見白鴿黨一眾老嫩鴿後，尋日佢一早又同一對外籍男女出海，到夜晚更喺寓所招待同屬「搞事四人幫」嘅白鴿黨創黨主席「李漢奸」李柱銘、「民主阿婆」前政務司司長陳方安生及天主教香港教區前主教陳日君。選舉委員會選舉及特首選戰即將展開，莫非漢奸黎等人又密謀攪局？
黎朝早偕外籍男女出海
尋日朝早九點鐘，漢奸黎同家人乘坐其平治座駕去西貢遊艇會碼頭上船出海，直到下午約四時先至上岸。不過，上岸嘅就唔止漢奸黎同家人，仲有一男一女外籍人士。戴住頂草帽嘅漢奸黎落船後就同家人乘座駕返回何文田寓所，至於嗰對外籍男女就乘坐由漢奸黎安排嘅另一部私家車，去咗銅鑼灣禮頓道一間酒店。
直到傍晚六時許，李漢奸同太太駕車去到漢奸黎寓所，已經換過衫嘅漢奸黎就出嚟迎接。隔咗幾分鐘，陳日君亦乘坐漢奸黎安排嘅私家車到達。冇幾耐，民主阿婆亦都坐漢奸黎嘅座駕到達，同行嘅仲有神父劉勝義。佢哋喺漢奸黎寓所逗留到九點幾先散場，李漢奸夫婦就車埋民主阿婆離開，而陳日君同劉勝義就乘漢奸黎嘅座駕返家。
老嫩鴿早前到訪料謝票
漢奸黎喺立法會選舉期間力谷白鴿黨候選人，因而被質疑有操控選舉之嫌，點知選舉後無耐，以李漢奸為首嘅一眾老鴿就率領多名新當選嘅乳鴿到漢奸黎寓所，係咪謝票兼慶功，真係唔使多講喇。事隔幾日，尋日又輪到「搞事四人幫」聚首，須知呢幫人聚集多數係本港政局出現或將有重大事情發生之時，而現時選委會選舉及特首選舉前期工作正密鑼緊鼓，未知「搞事四人幫」聚首係咪又密謀攪局呢？
卓妮