香港社會內鬥不斷，爭拗多多，搞到家嘈屋閉，永無寧日，負能量爆錶，好在凡事無絕對，好似過去兩日中秋佳節咁吖，最少五人捐出器官，令多名垂危病人重獲新生，真係好值得點讚！
冇錯喇，救人一命，勝造七級浮屠，身後遺愛人間，造福社會，讓生命以另一種方式延續落去，何樂而不為。可惜吖，港人雖然出名愛心爆棚，為善不甘後人，但講到捐贈器官咯喎，就要加把勁嘞。家陣全港有二十萬人登記成為器官捐贈者，只佔人口比例百分之三，而每百萬名港人只有五點四人死後捐出器官，比例遠低於歐美等先進國家，而最令人擔心嘅係，過去幾年本港捐贈器官宗數有所減少，以致部分病人等唔切移植手術含恨而終。好似腎臟移植咁，輪候人數近二千，而每年平均得幾十宗遺體捐贈，病人閒閒哋要等三年五載，都咪話唔誇張。
點解捐贈器官嘅風氣尚未普及？其中一個主要原因係港府宣傳不足。大家有眼見，當局宣傳手法嚟嚟去去幾道板斧，幾乎次次都係高官攞住張大型捐贈卡道具擺甫士影相，行禮如儀，做騷咁做。查實推廣器官捐贈，外國有好多行之有效嘅方法，好值得港府借鏡，就講澳洲政府咁吖，為器官捐贈者發放津貼，鼓勵僱主提供有薪假期，以增加誘因；至於針對本港特殊情況，有人建議為器官捐贈者優先編配公營骨灰龕位，都唔係冇得諗（口架）。
當然喇，中國人死後留全屍嘅觀念根深柢固，要移風易俗唔係一朝一夕嘅事。早排港府聲稱就「預設默許捐贈器官機制」諮詢公眾，但正如有接受器官移植手術嘅過來人話齋，捐器官最緊要出於自願，如果被迫或當「例行公事」，盞搞嘅咋。有辦你睇，新加坡推行「選擇不捐贈」制後，捐贈率不升反跌，咪就係因為民眾觀念跟唔上囉。
俗語講得好，榜樣嘅力量係無窮嘅。好多外國政治領袖都以身作則，帶頭捐贈器官，遠嘅有英國前首相戴卓爾夫人，近嘅有馬來西亞總理納吉布，就連內地官員亦唔例外。講到內地官員，有樣嘢不得不提，中國人原本流行土葬，但喺內地歷代領導人帶頭簽字火葬嘅號召下，觀念已經徹底改變。話時話，香港超過九成人都係火葬，所謂留全屍根本無從談起，再講吖，正所謂人死如燈滅，點解唔犧牲小我，幫下其他人呢。
總之一句講晒，捐贈器官，由高官做起，反正港產官僚食嘢唔做嘢，做嘢打爛嘢，承諾身後捐出器官，起碼都叫做為市民做番件好事吖，吓話！