政情：陳振英做議員 要過太太嗰關
金融業界工作忙碌，要兼顧埋其他工作就忙上加忙。本身係中銀香港董事秘書嘅候任金融界立法會議員陳振英（Ronick）平時已經朝七晚十一工作，依家為咗做好立法會工作，惟有同公司申請調職，希望做啲冇咁困身嘅職位。不過，Ronick就話，平時工作做決定都係兩秒就扑錘，但決定參選做議員就諗咗兩個星期，原來最難過嘅係太太嗰關。
Ronick話，太太之所以對佢做議員有意見，係因為佢平時已經工作好忙，每朝七點起身要開住電腦，時刻睇住有冇公司郵件，要到夜晚成十一點先可以熄機，所以太太就怕佢辛苦，亦都擔心佢唔習慣議會生態，但好彩Ronick最後都成功說服到太太。
保持獨立 拒入政黨
作為議會新丁，乜嘢都要由零開始籌備，Ronick就請咗曾經同佢一齊喺南洋商業銀行共事過嘅舊同事，擔任其立法會議員辦公室嘅「大內總管」。無政黨嘅Ronick又話，因為銀行業界希望佢可以保持獨立身份，所以佢都唔會加入政黨，但佢就唔介意加入「早餐會」、「午餐會」或者「晚餐會」喎。