政情：選戰輸條街 工聯會迷途
剛結束嘅立法會選舉，多位現任議員都戰敗收場，特別係勞工界，更加連資深老將都被叮走。好似主打勞工權益嘅工聯會，旗下勞工界議員鄧家彪（阿彪）及做咗三屆立法會議員嘅王國興都連任失敗，被迫告別議會。有工聯會中人分析，認為主打勞工議題再難以吸納選票，港人似乎已偏向選擇專業人士或年輕人進入議會尋求突破，勞工政團應該思考未來路向，喺迷失中搵出路，否則只有死路一條。
與泛民互罵 兩敗俱傷
有工聯會中人分析指，今次選舉主打勞工嘅議員，無論係資深嘅王國興，抑或係積極跟進亞視、德爾斯等機構倒閉欠薪問題嘅阿彪，都未能連任。而呢個情況唔單止出現喺建制派，就連泛民主派嘅工黨都係一樣，該黨兩老將李卓人及何秀蘭亦雙雙敗選，好明顯勞工議題難以吸納選票。此外，泛民與建制派勞工政團近幾年互相攻擊、指摘對方出賣工人利益，令市民只記得佢哋互相辱罵，最後落得兩敗俱傷。
阿彪接受網媒訪問時亦坦言，敗選後令佢反思一直行緊嘅路線係咪有錯，亦對選民認為票投工聯會等同投畀民建聯、工聯會係「民建聯B隊」等諗法覺得茫然，甚至覺得無論幾努力為勞工權益打拚，都唔能夠感召到打工仔選民。佢又指，現時政治蓋過民生，除非工聯會路線或社會形勢有重大改變，否則再過四年，選舉結果都係差唔多。有意見認為，港人較傾向支持專業人士，正正就係工會中人難有嘅形象。
角色欠突出 缺乏亮點
至於同屬工聯會、自動當選嘅勞工界議員陸頌雄及何啟明亦話，已經開始思考自己同工聯會嘅路線。何啟明坦言，勞工議題如全民退休保障、標準工時等已經唔再係工會嘅專利，其他政黨都會插手，工聯會角色唔夠突出。成功連任新界西議員嘅麥美娟亦話，過去勞工議題過於沉悶，欠缺亮點，難以吸引選民，將來必須思考如何突破困局。勞工界政途難行，睇嚟佢哋要研究如何轉型殺出新血路至得喇！