中環出更：雙根政壇失意 轉戰商界
即將卸任立法會香港島議員嘅民建聯鍾樹根，喺今次立法會選舉中只排喺名單第二位而無法連任，而樹根嘅前黨友、前立法會漁農界議員黃容根（根叔）亦捲土重來失敗，兩人都是政壇失意。不過，樹根就話離開議會後仲忙咗，皆因佢會搞公司搵真銀，甚至有人搵佢合作到內地蘭州養羊，而呢個人就係根叔喇！
黃容根海南島種番薯搵真銀
根叔承認，目前有返大陸養羊及種果樹嘅打算，但仲要解決土地問題，睇嚟大計十畫只得一兩撇！不過，佢已經成功喺海南島從事種植日本紫心番薯嘅生意，因為種植番薯較易覓地，而且只需種植四個月就有收成，難怪佢會首先試種番薯喇！
咪以為種番薯好「濕碎」，原來利潤好高，據講每斤番薯種植連運輸成本只係三元，但出售三十多元，係成本嘅十倍價錢。不過，根叔就話自己身為香港有機認證中心主席，會以生產優質農產品為大前提，賺錢並非首要條件喎。
根叔嘅漁民形象深入民心，所以佢強調並無放棄漁業，皆因已經喺香港租咗啲魚塘，準備用作孵化魚苗賣畀本土漁民，實行漁農業一齊發展。雖然根叔重返議會願望落空，但睇嚟日後生活依然充實！
卓妮