政情：卿姐卸任 工作交晒畀阿廷

卿姐本身係立法會多個委員會成員，尋日佢就同阿廷舉行交接記者會，佢話希望阿廷可以接手加入呢啲委員會，以及加入現屆該黨冇成員參與嘅政府帳目委員會，但都要同其他泛民商量吓先得。而卿姐亦都打算將處理開嘅在囚人士及地區個案都一併交畀阿廷接手，更直言「聯絡林卓廷等於聯絡民主黨」。

要負責七至八個委員會

連同阿廷自己希望加入嘅委員會，最終要負責嘅委員會多達七、八個，都幾吃力。卿姐就話，該黨會喺十一月開黨員大會提出黨政分家建議，十二月四日投票選出黨主席。卿姐話，如果大部分黨員都贊成立法會議員唔應該參選黨主席，幾位議員都未必會參選，所以最終未必需要修改黨章禁止在任議員參選。