政情：高唱《夕陽無限好》沈祖堯憑歌寄意？

中文大學尋日舉行教職員中秋聯歡會，校長沈祖堯與約六百名唔同部門嘅同事聚首一堂，迎接中秋佳節。沈祖堯席間與大學主管人員上台獻唱揭開序幕，其後又與賽馬會公共衞生及基層醫療學院助理教授鍾一諾合唱《夕陽無限好》，感慨萬分。此時此刻，選擇唱呢首歌，係咪憑歌寄意暗示自己會提早交棒呢？

任期至一八年六月嘅沈祖堯近期身形消瘦咗唔少，幾個月前更向師生及校友發信稱熱愛醫學，指年中會開展遴選下任校長，若對方願意喺佢任滿前上任，佢可提早交棒，可見佢萌生退意，因此尋日在中秋聯歡會獻唱《夕陽無限好》，確實惹人聯想。迎月前夕難得聚首，沈祖堯仲拿起傳統中秋燈籠與職員自拍合照，頗受歡迎。