中環出更：張國柱寸曾健超落敗意料中事
立法會功能界別選舉中，社會福利界戰況相當激烈，五名候選人有四人來自唔同泛民主派陣營，最後由社工復興運動發起人邵家臻以四千幾票當選，反而涉及「七警案」嘅曾健超只得千零票落敗。即將卸任嘅社福界議員、工黨張國柱（阿柱）認為，結果係預料之內。
指無為業界發聲
作為社福界代表，理論上應該要為業界付出，就算喺社會上有幾高知名度，都未必可以成功當選。阿柱認為，曾健超喺佔領行動期間因「七警案」而聲名大噪，但就無乜為業界發聲，所以票數比預期低屬正常現象。阿柱仲透露，佢喺曾健超拜訪時仲向對方大潑冷水添！
社福界曾經一度醞釀過初選，但最後都唔成事。阿柱認為，初選要成事機會好微，原因係投票方式有困難，例如要搞「實體票站」嘅話，又好難搵到地方。佢仲話，社福界選民除咗要係註冊社工，仲要有登記做選民，如果要搞網上投票，好難核實到選民身份。不過，今次大混戰下，議席都係落入非建制手中，仲要贏咁多票，唔使搞初選協調都贏啦。
卓妮