曾經有人講笑咁講，政府想帶動GDP其實好簡單，只要掘爛馬路再起番好就得。港產官僚做嘢烏龍百出，甩漏多多，補完一隻鑊又爆另一隻鑊，公帑好似倒落鹹水海咁，唔通真係想帶動GDP？
嗱，好似有超過五十年歷史、俗稱「三支香」嘅公屋插筒式晾衫架咁吖，耐唔耐就有居民慘變空中飛人，不知製造幾多悲劇。喺強大民意壓力下，房署前年終於斥資五億元為居民更換新晾衫架，可惜設計出現嚴重問題，衣架淨係掛得四件衫咁大把，居民得物無所用，加上安裝喺廚房窗外，衣物容易受煮食油煙影響，好多人自行喺室內安裝晾衫杆，甚至索性喺走廊同大堂晾衫，搞到七國咁亂。房署為咗補鑊，決定為三十萬合資格住戶額外加裝晾衫杆，預計花費近四億元。換句話講，晾衫呢個咁簡單嘅問題，房署前前後後花費近九億大元公帑，咁搞法，識印銀紙都係假！
有關注團體就講得啱嘞，「三支香」安全問題講咗幾十年，房署一直借咗聾耳陳隻耳，大玩拖字訣，之前一度想攤大手板問居民收番二百蚊安裝費，已經縮骨到冇朋友，而新晾衫架又問題多多，搞到要換來換去，唔止浪費公帑，簡直擾民。
真係諗極都唔明，呢啲咁低級嘅錯誤照計好容易避免，只要官老爺肯稍移玉步，從冷氣房走入尋常百姓家，實地了解一下用家情況，就唔會搞出個大頭佛。一句講晒，官僚決策閉門造車堅離地，想唔出事都幾難。
話時話，房署屋邨管理亂象叢生，絕對唔止換晾衫架甩漏咁簡單。好似公屋鐵閘咁，設計問題多多，住戶同開門揖盜冇咩分別，點知房署又係闊佬懶理，關人個關，話就話前年拍板為全港公屋換閘，可惜進度慢過烏龜，唔少居民仍然有得震無得瞓；又好似鼠患、蝨患等屋邨衞生問題，房署亦係唔踢唔郁，往往要等到傳媒介入至肯做嘢；至於搞到人心惶惶嘅鉛水危機，房署監管失職，更加係難辭其咎，市民真係多得佢哋唔少。
當然喇，天下烏鴉一樣黑，房署官僚得過且過，胡混度日，長期穩佔政府部門投訴榜前列位置，固然實至名歸，食環署、屋宇署、消防處等衙門三日唔埋兩日畀審計署同申訴專員公署狂炳，其實都係一擔擔嘅咋。
講起唔知好嬲定好笑，高官開口埋口「民生無小事」，偏偏同市民第一線接觸嘅部門有口皆悲，甚至連「三支香」都搞到一鑊粥，做鬼都唔靈，簡直大吉利是！見微知著，香港地政治經濟民生瓣瓣亂七八糟，民怨沸沸揚揚，依家知點解喇！