政情：謝偉銓指政府票倒戈致敗選
今屆立法會選舉中，建築、測量、都市規劃及園境界爆冷，競逐連任失敗嘅謝偉銓坦言對結果感到意外。佢話對於林雲峯鎅票已有所準備，落敗係因為業內部分政府票倒戈投畀另一對手姚松炎。該界別一向分為建築師及測量師兩大群組，當中測量師群組係謝偉銓嘅票倉，而選前嘅造勢大會中，由公務員組成嘅測量師和建築師組織，以及房協主席鄔滿海和市建局主席蘇慶和都到場支持，令謝偉銓相信可盡取業內政府票源。
今屆選舉面對非建制嘅姚松炎及同為建制派嘅建築師代表林雲峯，謝偉銓話原先估計可取得二千三百多票，而姚及林則分別約二千票及一千八百多票，惟最終結果係佢同姚松炎嘅得票相反，估計係部分政府票倒戈。謝偉銓話得悉部分政府測量師和建築師對近年政府政策不滿，所以很有可能投票畀姚松炎，以示不滿。
未來集中搞好自己公司
另一方面，林雲峯又扯走部分建制票源，最終令姚松炎爆冷跑出。講到未來四年去向，謝偉銓話選後有發展商邀請佢加入，但已拒絕，只希望搞好自己嘅公司。至於下屆會否再選，佢話需要考慮，但希望繼續幫助業界發聲，有意爭取加入與業界相關嘅官方諮詢機構。