政情：多口惹工聯會反擊 容海恩認衰
候任新界東立法會議員容海恩（Eunice）以三萬多票順利當選，但早前接受傳媒訪問評價工聯會在新界東落敗時，竟然話工聯會敗因係未能迎合社會潮流、未能與時並進，暗示工聯會落伍、老土。此番言論就惹起工聯會中人不滿，紛紛在網上展開反擊，令到Eunice尋日急急在Facebook（fb）認衰，指工聯會係一個好平台去服務市民。
因為操盤人要力保Eunice入議會，因而要放棄工聯會鄧家彪。阿彪就喺fb介紹一本書名包含「老土」二字嘅書籍，並大讚係好書，該書內容能解人心結。
阿彪更留言大談老土，指老土係傳統文化，而且散發着智慧。佢又引用宋朝張俞的《蠶婦》，指刻畫了世間嘅唔公平，未知係咪暗示今次選舉有所不公，暗寸有人憑「契女」身份而獲力捧。
阿彪嘅留言獲得多名工聯會中人和應，連任成功嘅新界西議員麥美娟就話，自己同阿彪嘅所在之處冇時差，唔使溝通溝通再溝通，明顯諷刺曾在選舉論壇上發表「議政時差」論嘅Eunice，而候任勞工界議員陸頌雄亦有留言贈興，火藥味甚濃。
fb貼文救火 盛讚「好平台」
Eunice可能見勢色唔對，尋日急急喺fb以「感謝好友，並肩同行」為題，話唔少政黨及參選人都係佢友好，包括阿彪同麥美娟，又話自己參加過工聯會嘅俄文班，確實係一個好平台去服務唔同背景及唔同需要嘅市民，又話自己要學習嘅事情實在太多喎。未就職就已經搞到要曲線認衰，真係唔知佢未來四年點過喇！