政情：許華傑談內地加盟店「怕怕」
內地十三億人嘅龐大市場十分誘人，但係成功非必然，唔少港商都有「交學費」嘅慘痛經歷。做紡織生意嘅中華出入口商會副秘書長兼福登實業董事總經理許華傑（Michael），就試過喺內地發展一個戶外品牌嘅特許經營生意，但係加盟商竟然好隨意咁賣埋其他產品。Michael笑稱，當時好驚佢哋賣埋魚蛋、三文治，依家諗番都唔知好嬲定好笑。
先專注打好品牌基礎
點解Michael勾起呢個失敗回憶？事關佢最近買咗一個澳洲設計師品牌嘅童裝，呢個品牌唔係行可愛嘅卡通圖案，而係行型仔型女路線，所以早前Michael喺上海搞騷，反應好好，有內地公司更加游說佢喺內地發展特許經營添！不過，Michael見過鬼都怕黑，梗係即刻耍手擰頭啦，佢話打好個品牌基礎先講喎！