中環出更：民調捱插鍾庭耀賴政府制度
立法會選舉告一段落，喺壹傳媒黎智英力谷部分泛民主派候選人，以及「佔領中環」發起人戴耀廷發起「雷動計劃」棄保配票下，令多名泛民老將落敗。香港大學民意研究計劃總監鍾庭耀就喺尋日播出嘅電台節目中，解釋點解港大民研會退出票站調查，佢批評港府向政治傾斜，對違規使用票站調查者視而不見，所以佢改為做滾動調查。事實上，滾動調查亦惹來批評，被質疑是為泛民告急，並為雷動計劃提供民調數據。
稱比例代表制差勁
鍾庭耀又批評立法會選舉比例代表制係好差勁嘅制度，直接導致大黨配票、小黨搶票及議會分裂，加劇社會分化。佢又話，喺超級區議會選舉中，泛民及建制派得票比率係五成八對四成二，選舉結果三比二完全符合比例。不過，地區直選建制派得票僅約四成，但就贏取四成半議席，明顯係因為策略投票嘅結果及制度不公咁話。其實今次配票嘅唔止建制派，泛民多名老將落敗皆因雷動計劃棄保建議。咁鍾庭耀係咪應該怪埋戴耀廷配票搞亂泛民呢？
卓妮