中環出更：高叔平恨抱孫女 向囝囝催婚

香港鐘表業總會副會長兼華明行副總裁高偉國（Tim），早前為佢創辦嘅淳生國際舉行健康產品發布會，Tim嘅爸爸華明行董事長高叔平、媽媽高李蓓蒂等家人總動員去撐場。唔講唔知，Tim除咗幫手睇住家族盤鐘錶生意之外，仲做埋私募基金、紅酒及餐廳生意，百足咁多爪。高叔平見個仔咁叻梗係開心啦，但佢笑稱希望阿Tim快啲結婚，生個孫女畀佢抱吓仲開心喎！
胡郭秀萍（中）及丁毓珠（右）抽空現身聽健康講座，高叔平（左）幫手招呼。（溫國佳攝）
胡郭秀萍（中）及丁毓珠（右）抽空現身聽健康講座，高叔平（左）幫手招呼。（溫國佳攝）

高叔平笑笑口咁話，佢有兩個仔，大仔高鼎國亦生咗兩個仔，所以好想有個孫女，形容自己恨抱孫女恨到流口水。身兼婦協名譽會長嘅高太當日亦忙到氹氹轉，因為一班城中名媛都去捧場，包括婦協主席林貝聿嘉、名譽會長胡郭秀萍及丁毓珠等人。

林貝聿嘉健康靠朋友

講到健康，林貝聿嘉話，除咗食健康產品之外，保持健康嘅秘訣就係出來見吓朋友，大家風花雪月一番就開心晒喇！一向忙到飛起嘅丁毓珠就自爆，最近耳水不平衡，醫生已叮囑佢唔好做得太辛苦。婦協名譽會長李楊一帆都有到場，卓妮見佢保養得宜，秘訣係日日健走個半小時，三十幾年風雨不改，難怪佢咁精神爽利喇。

林貝聿嘉（中）拉隊支持高李蓓蒂（右二），李楊一帆（左一）及婦協名譽會長林康繼弘（左二）、葉溫金燕（右一）等好友趁機歡聚。
  • 林貝聿嘉（中）拉隊支持高李蓓蒂（右二），李楊一帆（左一）及婦協名譽會長林康繼弘（左二）、葉溫金燕（右一）等好友趁機歡聚。
高偉國（右）同台灣牛樟芝後人金德泰（左）拍住做健康產品生意。
  • 高偉國（右）同台灣牛樟芝後人金德泰（左）拍住做健康產品生意。

話時話，阿Tim年紀唔大，點解會對健康產品咁上心？原來佢長期飲酒應酬兼夜瞓，四年前驗出尿酸、膽固醇及肝酵素都超標。後來朋友介紹服用台灣國寶級牛樟芝膠囊，兩年後再驗身，竟然所有指標都正常，佢仲以為醫生畀錯報告添！咁正，梗係要介紹畀香港人喇！

卓妮

第一手消息請下載on.cc東網iPhone/iPad/Android/Windows Phone Apps