政情：傷膝何啟明 踢波難復當年勇
候任立法會勞工界議員何啟明（Jonathan）一早已經自動當選，接替現任勞工界議員郭偉強同鄧家彪嘅棒。Jonathan都係好波之人，唔知佢會否接埋郭偉強喺立法會足球隊嘅位置呢？Jonathan就好客氣話無郭偉強咁好波，仲話後生時已用晒踢波配額喎！
Jonathan專長踢後衞，佢話以前好識把握時間，返學前後及午膳時間都會落場玩，但讀大學時一次踢波受傷就徹底改變咗。話說佢當年讀中文大學，中大嘅草地出名爛，有一日因為誤踏地上嘅凹陷處而受傷，右腳更即時發出「啪」一聲添！Jonathan即刻睇中大醫生，但幾日後仍未好轉，於是轉睇其他醫生。佢話可能因為延誤處理，搞到膝頭唔能夠再應付激烈比賽。不過立法會足球隊都唔算踢得太激烈，Jonathan都可以做吓後備，過吓足球癮嘅。
