政情：初試自動泊位 盧金榮驚過鬼
汽車自動泊位系統技術已推出一段時間，菁英會主席盧金榮（Wingco）話，好耐之前喺外國自駕遊時，已經好想試吓自動泊位系統，但當年呢樣技術仍未普及，直至去年喺香港買咗新車，設有自動泊位功能，佢就搵日試用，第一次試時都好無信心，因為唔使踩油、又唔駛扭軚，起初會諗「到底得唔得o架，會唔會撞o架？」
Wingco話，當時都有屋企人一齊試，仲特登搵咗個冇乜車嘅停車場，咁就安全啲，可以慢慢試，試咗之後覺得好穩定，對呢項技術有番信心。佢又提到，依家香港冇得試無人駕駛，下次去美國嘅時候，一定會試埋喎！
愛妻號 太太網購不設限額
講起科技，Wingco又話十年前初試網上購物都係冇信心，唔知係咪真係買到嘢，又怕被人偷走信用卡密碼等，但依家就對網上保安系統好有信心，但為安全起見都會將網上購物限額設低啲，但太太嗰張卡就冇設限額，任買唔嬲，認真係愛妻號！