笑看天下:宜居狂跌老鼠急升

一項「城市宜居度」調查公布,在六十七個國家及城市評分,本港僅排名第四十四位,較去年的第二十六位及前年的第十位大幅下跌。撞鬼你咩!跌係常理,有關調查分明大整蠱!阿哥,一口價,四十八!

一個政治化嘅城市,連中學校園都成日在播「毒」,原本一個寧靜嘅學習地方,學生不是學習德智體群美,而係要討論虛無縹緲嘅「港獨」,屆時學不成文武藝,冇貨賣與帝王家,出到來社會才知道自己冇料到,那時才仰天長嘯:白了少年頭,空悲切!一個原本應該發展經濟嘅城市,在冇神經政府嘅帶領下,經濟發展一潭死水,在死水裏空轉,連蚊都孳生唔到一隻,市民搵唔到食,積累怨恨,永遠在臨界點徘徊!這樣充滿動盪、危機四伏嘅城市,梗係唔多宜居喇。

講開又講,香港不宜居,除了冇咗昔日歲月靜好嘅悠游,成個城市好似中邪咁,立法會淪為垃圾會,議政就冇,飛杯掟溪錢就常上演;至於拉布流會成為激進議員主要任務,民生從來不是他們心目中嗰杯茶,難怪同文及讀者慨嘆:九月四日投票日,手中一票,對住一堆爛果揀唔落手。老朽欣然會意:這票,隨風,投給大海,樂得瀟灑身後名!

香港不宜居,見微知著。一個立法會投票日,儼然如伊斯蘭國打到來,不是嗎?消息指警方將動員三千名警員作最高戒備,包括「速龍隊」、機動部隊、衝鋒隊和五大總區刑事調查人員。大陣仗到嚇死人!呢次係繼領導人早前訪港,為怕旺角黑夜「讓磚頭飛」重演,在立會外用膠水黐磚後又一傑作!如此「無橋、無膽、無能」嘅冇神經政府,試問如何帶領港人勇闖明天?一個如此躁鬱嘅城市不宜人居,卻最適宜養老鼠!你睇!東一隻,西一隻,日光日白都出來廣東道街市閒庭信步,相信遊客見到必定視為奇景。食環署滅鼠無方早就街知巷聞,旺角鼠患惡化,預咗啦!