政情：鄭承隆網上直播屢敗屢試
網絡宣傳對新一代政黨真係好重要，就連新思維副主席鄭承隆尋日出席政黨活動時都要舉起手機直播現場情況，滿足吓「家庭觀眾」嘅需要。咪睇鄭承隆拍片時駕輕就熟，但佢自爆當初做直播都經歷好多次甩轆，不過失敗乃成功之母，佢好快就捉到竅門，仲話要好好利用網絡文化，同年輕一輩介紹第三路線添！
反覆練習改善技術
鄭承隆話佢初時做直播都出現唔少甩轆嘅情況，例如有畫無聲、手震、講嘢冇重點，又或是聲音時大時細等，但經過多次反覆練習已經成功改善技術問題，至於講嘢冇重點呢方面就要靠剪接技術協助嘞！佢又話會將片段控制喺一分半鐘左右，以免太長悶親班網民，經過多番改善之後，睇片嘅人數上升唔少。
真係估唔到，原來拍片都有一定成效。鄭承隆話佢哋透過facebook專頁都招收到八至九個三十歲以下嘅義工，又話恰巧有數碼電台「執笠」，於是搵咗部分人兼職幫手拍片，未來仲會推出兩條短片，有惡搞、有溫情，希望以唔同角度令年輕一輩加深認識。