仲有唔夠一個月就到中秋節，東華三院副主席李鋈麟就同弟弟、博愛醫院副主席李鋈發一齊印製中秋節賀卡畀朋友。李鋈麟以古靈精怪造型示人早有前科，舊年十二月就將同李鋈發喺醫療輔助隊會慶表演芭蕾舞嘅芭蕾舞裙造型印製成聖誕賀卡，為大家帶來視覺衝擊。今次兩兄弟又再搞搞新意思，兩人化身Ｑ版公仔，哥哥李鋈麟就變身功夫熊貓拎住個大月餅，弟弟李鋈發就扮成提住燈籠嘅玉兔，認真生鬼，唔知下次佢哋又會有咩新驚喜帶畀大家呢？
