政情：陸頌雄係工記御用攝影師
工聯會（工記）候任勞工界立法會議員陸頌雄（Michael）唔只喺地區一腳踢，原來仲係工記御用攝影師！Michael話，佢曾經幫過唔少黨友影宣傳相，可以慳番筆錢，至於執相都係執吓光暗之類，絕對以真實為首要，一定認得真人。佢亦有幫另一名勞工界候任議員何啟明影過相，但何啟明就笑笑口話，影得麻麻哋，唔係咁啱用喎。
Michael話，佢讀中學嗰陣，暑假已經做兼職攝影助理，當時月薪有八、九千元，依家都會幫街坊影吓家庭相，會預訂社區中心房間，並自備攝影器材，每個家庭影約十五分鐘，上下晝各影十幾個家庭，都幾辛苦o架，但好處就係街坊永遠記得佢，佢亦會永遠記得街坊個樣。