政情：fb換新相 馮程當甩難？
早前捲入與富商換樓醜聞嘅民政事務局常任秘書長馮程淑儀，已經喺上周六開始休假，唔知係咪因為放假心情放鬆咗，佢尋日更新咗四個多月冇改變嘅個人facebook帳戶，將封面相同個人資料相，由原本烏雲密布嘅天空同兩朵花，改成有樹、草地同湖景嘅相片，但湖景相片仍然係烏雲密布。
唔知呢啲相係咪馮程淑儀喺外遊時拍下嘅風景照，抑或係代表咗佢嘅心情，但佢嘅fb帳戶中，就有朋友向佢表示關心，留言稱「總會雨過天晴」同埋「大自然常賜我們力量（Nature always gives us strength）」。
廉署調查冇新進展
曾到廉署舉報馮程淑儀嘅人士話，至今未聞案件有新進展。馮程淑儀有閒情逸致更新社交網站，未知係咪因為調查咗咁耐，仲未有新消息，所以就當暫時冇事呢？
之前都講過，馮程淑儀喺上周六開始休假，但九月會出席巴西殘疾人士奧運會，直至下個月中先返港。