政情：變相「拆轎」港大民調 「鍾」認衰
多個團體同傳媒機構都委託由鍾庭耀做總監嘅港大民意研究計劃，就今屆立法會選舉進行民調，卻惹嚟唔少風波。皆因多個政黨都批評港大民研做民調時，冇將排第二位嘅候選人讀埋出嚟，令「抬轎」效應出現唔到，要求港大民研讀埋第二位出嚟，但港大民研尋日下晝發新聞稿仲死撐調查方法冇問題。不過到咗傍晚終於撐唔住，要「跪低」認衰，話即晚起轉為讀埋第二位候選人，唔知係咪咁就可以止血呢？
親泛民團體「民主動力」同多個傳媒自七月尾起，委託港大民研進行滾動民調，調查全港五個直選選區同超級區議會候選人支持率。雖然係大學進行民調，但仍然被質疑係咪可靠。社民連、人民力量以至自由黨，早前分別舉行記者會及去信，話港大民研今屆起未有讀出名單排第二候選人，令佢哋多區候選人支持率較低，要求佢哋讀埋，以免令選民棄保，影響選舉結果。
突改口風 讀埋第二位
港大民研尋日下晝發新聞稿，話本月十一至十五日，除咗一般「讀出一人」方式訪問一千零廿七名選民外，仲隨機抽取四百六十九人，以「讀出兩人」方式進行反覆測試。佢哋話分析後，發現兩組數據喺統計上並無顯著差異，所以毋須調整以往調查數字。至於應唔應該調整調查方法，佢哋會視乎各界人士對中期報告嘅反應而盡快作出決定。
咁講法，鍾庭耀擺明繼續死撐喇！點知隔咗幾個鐘頭之後竟然峰迴路轉，民主動力召集人趙家賢引述鍾庭耀話，由尋晚起將會讀晒名單頭兩位候選人，對此感到歡迎。嗱！終於撐唔住，要「跪低」認衰嘞！而自由黨就話港大民研肯從善如流喎。
網傳拉高建制派比率
除咗讀唔讀第二位候選人爭議，尋日網上討論區廣泛流傳一張貼文，引述話聲稱港大民研職員承認，民調拉高咗建制派候選人支持率，仲張貼咗一張相，顯示有三名建制派候選人，分別被拉高三至七個百分點不等，話咁做係為泛民打「悲情牌」，博選民同情票，聲言建制派表面上睇係大熱，其實分分鐘連底褲都輸埋。我哋就此問過港大民研，但至截稿前未有回覆。謠言傳傳吓就會變真，睇嚟港大民研要盡快回應喇！