中環出更:黎棟國聯署撐保留文具小店

大埔運頭塘商場喺五月底易手,多名小商戶獲新業主通知需於明年一月遷走。多間商舖發起簽名行動,要求新業主保留小店,其中一間小店更獲保安局局長黎棟國簽名力撐。嗰間商舖就係其昌文具玩具精品公司,由上星期開始喺店內收集簽名,至今已收到逾千五個簽名,而黎棟國就喺前晚去簽名支持。

義助店主處理合約

店主羅先生透露,黎棟國嘅太太係大埔街坊,而黎亦不時同太太到邨內用餐及光顧文具店,所以已經認識多年。由於羅先生唔識英文,續約時得到有法律背景嘅黎棟國幫手翻看合約,黎更將合約要點翻譯成中文,冒着滂沱大雨前往文具店解釋,事件令羅先生感動不已。

而黎得知小店即將結業,亦特意前往安慰羅先生,見到店內收集簽名更主動參加聯署。羅先生大讚佢親民同冇架子,希望其他官員亦都能夠多落區接觸基層市民,同時亦力斥領展無良。

保安局局長新聞秘書亦證實,黎棟國夫婦前晚曾到運頭塘邨其昌文具店簽名,以支持保留小店,而黎亦係該店熟客,對小店結業感到可惜。

卓妮

第一手消息請下載on.cc東網iPhone/iPad/Android/Windows Phone Apps