中環出更：鄭承峰「自」療撞傷靠減肥
仁濟醫院行政總裁黃偉健今個月底即將退休，人緣好好嘅佢最近不停同各界好友食飯道別，早前仁濟董事局及顧問局就聯手搞咗一場溫馨嘅榮休宴，感謝佢十幾年任內對仁濟嘅建樹。早前撞車整親嘅仁濟董事局主席鄭承峰（Baldwin）都有到場，卓妮梗係第一時間問佢好番晒未，佢笑稱無乜大礙，只係被「頂到個肺」，減吓肥就冇咁痛喎。
卓妮以為佢講粗口，Baldwin就冷面笑匠上身話，當時佢正想搭的士，但後面有架的士撞埋嚟，結果佢就被撞親肋骨，咁骨後邊係肺，咪「頂到個肺」囉！真係識講笑。
Baldwin話初時以為冇事，冇去睇醫生，直至第二、三次坐飛機時先知痛，但最終都係冇睇醫生，佢仲自己斷症話只要減吓肥，上身冇咁重就得喇！
同場仲有前主席林煒珊、蘇陳偉香同董吳玲玲等人，顧問局主席王忠秣、兒子王賢訊（Vincent）夫婦及孫仔Eason亦三代同堂趁熱鬧。卓妮見今屆新丁總理鄧國樑（Jimmy）同Vincent一家人好熟，原來佢哋係大埔一個豪宅嘅鄰居，亦係Vincent介紹佢加入仁濟。
鄧國樑真正「建設」香港
Vincent話Jimmy係真正「建設」香港嘅人，事關佢係做鋼鐵五金供應商，全香港馬路邊嘅欄河、防撞欄有七、八成物料都係佢公司供應，話佢係「新鋼鐵大王」也不為過。
卓妮