人衰行路打倒褪，有時連食豆腐都會骾死，好似消防處咁吖，管理混亂，醜聞多多，連每年例行公事嘅學員結業禮都有本事搞出個大頭佛，真係唔到你唔服！
消防及救護學院日前舉行結業禮，一時限制學員親友入場人數，一時又多發門票，訊息混亂之下，令人以為被默許離校送飛畀親友，結果其中十一個偷走嘅學員被迫自願離職。正如「東方報業民意調查」顯示，雖然唔少受訪者認為學員心急犯錯，咎由自取，但更多人指摘管理層安排失當，一時一樣，累及無辜學員受罪，簡直係靠害！
話時話，呢單嘢仲有好多疑點未解開，有人話偷走嘅多達百人，亦有人話事件涉及點名頂包，家陣淨係搵十一人祭旗，公平何在？再講吖，如果話學員違規要罰，咁學堂如無掩雞籠，自出自入，管理層該當何罪？消防處又玩捉小放大，避重就輕，好難服眾喎。
講到底，集體偷走醜聞只係「病徵」，消防處根深柢固嘅擦鞋文化先至係「病根」。試諗吓，點解無喇喇學員會突然多咗飛可以請親友嚟觀禮？今次係處長黎文軒任內最後一次以檢閱官身份主持結業會操，係咪擔心萬一場面太冷清，有人會唔高興？如果唔係博老細歡心，點解仲容許受處分學員參加埋結業操至離職？大部分受訪者批評處方做咁多嘢都係為粉飾門面，直斥部門擦鞋文化嚴重，證明公道自在人心。
大家有眼見，消防處歷任處長最鍾意搞「退休騷」，除咗學員步操、模擬救火表演呢啲例牌菜，仲試過因為動用最精銳裝備做布景板，搞到要搵老爺消防車救火，同搵市民條命較飛冇乜分別。所以話，消防處管理無方，擦鞋有術，唔出事至奇。
講起消防處醜聞，真係一匹布咁長。入錯貨、浪費公帑有之；設備老化、「軟水救近火」有之；不務正業，充當政治打手有之，簡直沒有最醜，只有更醜。最騎呢係新落成嘅消防及救護學院竟然變成老鼠樂園，幾十名學員懷疑食物中毒，未來消防員自身難保，點救人吖。又例如舊式工廈，次次爆完大鑊官老爺都話要取締安全隱患，點知次次都係三分鐘熱度，結果死人冧樓悲劇一再重演，唔怪得畀人話「政府冇神經，部門冇靈魂」喇。
一日最衰都係港府管治無能，搞到紀律部隊無紀律，亂象叢生，消防處係咁，警隊更加衰多幾錢重，砌生豬肉、包庇護短、警黑勾結樣樣齊，咁搞法，香港有乜法子唔福地變危地，市民有乜法子唔爭住用腳投票，移民他去吖！